Israel: Ibisigazwa by’umupilote waguye mu Nyanja byabonetse nyuma y’imyaka 56

Misiri: Hashyizwe ku isoko umuti wongerera abagore ubushake mu mibonano mpuzabitsina

Misiri yabaye igihugu cya mbere cy’Abarabu cyemerewe gukora no gucuruza umuti witwa ’flibanserin’ wongerera abagore ubushake bwo gukora imibonano mpuzabitsina.

Hashize imyaka itatu umuti wa ‘Flibanserin’ uzwi nka Viagra y’abagore wemewe gukorwa no gucuruzwa muri Leta zunze Ubumwe za Amerika.

Ubuhamya umwe mu bagore bakoresheje iki kinini yahaye BBC, yagize ati “Umuhanga mu by’imiti ‘Pharmacien’ yambwiye ko nzajya nywa ikinini kimwe buri mugoroba, njye n’umugabo wanjye twifuzaga kureba ikizakurikiraho. Nabikoze rimwe ariko sinzabyongera.”

Uyu mugore wahawe izina rya Leila muri iyi nkuru yakomeje avuga ko nyuma y’imyaka 10 yubatse urugo, aribwo yakoresheje iki kinini.

Gutandukana hagati y’abashakanye mu Misiri ngo bikomeje kwiyongera, ibitangazamakuru bimwe bikavuga ko biterwa ahanini n’ikibazo cy’imibonano mpuzabitsina kiri hagati y’abashakanye.

Abakora ibinini bya ‘flibanserin’ bavuga ko abagore batatu ku 10 mu Misiri, bavuga ko bafite ikibazo cy’ubushake bwo gukora imibonano mpuzabitsina. Iyi mibare ariko biragoye ko yakwemezwa n’urwego rw’igihugu.

Ashraf Al Maraghy, uhagarariye sosiyete ikora biriya binini yagize ati “Uyu muti uziye igihe. Ni iterambere.”
Bisanzwe bimenyerewe ko umuti wa ‘viagra’ ukoreshwa n’abagabo bafite ikibazo cyo kubura ubushake mu mibonano mpuzabitsina, ariko kumva ko uwo muti wanakorewe abagore hari abumva ko bitangaje.

Mu myaka yashize Ikigo gicunga kandi kikagena imikoresherezwe y’ibiribwa ndetse n’imiti ku Isi, nticyemeraga na gato ikoreshwa ry’imiti yongera ubushake bwo gukora imibonano mpuzabitsina ku bagore.

Iki kigo kandi cyemezaga ko nta miti ikoreshwa mu kuvura ibibazo bijyanye no kugabanuka k’ubushake bwo gukora imibonano mpuzabitsi mu bagore yari yaboneka.

Kugira ubushake bwo gukora imibonano mpuzabitsina ku bagore bituruka ku mpamvu nyinshi zirimo n’umunaniro ukabije.

Na none kandi ngo kugabanuka cyangwa kwiyongera kw’ubushake bwo gukora imibonano mpuzabitsina ku bagore bishobora guterwa n’igihe umugore agezemo. Urugero nk’igihe atwite cyangwa ageze mu gihe cyo gucura (menopause).

Ibibazo bituruka ku buzima bwo mu mutwe na byo bishobora guhindura urugero rw’ubushake bwo gukora imibonano mpuzabitsina.

Indwara nka diabète ndetse n’ibindi byose ngo bishobora kugira uruhare mu kugabanura ubushake bwo gukora imibonano mpuzabitsina ku bagore.

Leave a Reply

Your email address will not be published. Required fields are marked *