Israel: Ibisigazwa by’umupilote waguye mu Nyanja byabonetse nyuma y’imyaka 56

Rulindo: Urujijo ku by’umuforomo ufunze azira icyuma cy’ibitaro basanze ku kiraro cy’inka ze

Rulindo: Urujijo ku by’umuforomo ufunze azira icyuma cy’ibitaro basanze ku kiraro cy’inka ze
Tariki 26 Gashyantare 2019, nibwo icyuma gikoreshwa mu gukangura umurwayi wagiye muri koma kizwi nka Defibrillator cyabonetse ku kiraro cy’inka z’umuforomo wo ku bitaro bya Kinihira mu karere ka Rulindo, uwo muforomo ahita atabwa muri yombi ariko hari abantu batandukanye barimo abakoranaga nawe bashimangira ko ibyo ashinjwa byaba ari ubugambanyi yakorewe n’abantu barimo umugore we n’ubuyobozi bw’ibitaro.

Mu masaha ya saa sita n’igice z’amanywa ya tariki 26 Gashyantare 2019, nibwo iruhande rw’ikiraro cy’inka za Habineza Jean Claude, habonetse iki cyuma cyitwa Defibrillator. Cyari gipfunyitse mu ipantaro, umukozi wo mu rugo rwa Habineza Jean Claude niwe wakibonye. Ku bitaro bya Kinihira aho uwo Habineza Jean Claude akora, ntabwo byari byigeze bimenyekana ko icyo gikoresho cyibwe cyane ko ngo kitakundaga gukoreshwa kenshi.

Nyuma y’uko ibyo bibaye Habineza Jean Claude yahise atabwa muri yombi, ubu akaba afunzwe ariko iby’ifungwa rye birimo urujijo kuko abaturanyi b’uyu muryango n’abakoranaga n’uwo muforomo bavuga ko yagambaniwe, bagashyira mu majwi ubuyobozi bw’ibitaro bya Kinihira ndetse n’umugore w’uwo muforomo.

Iki nicyo cyuma umukozi wo mu rugo rw’umuforomo yasanze ku kiraro cy’inka zabo

Umwe mu bakozi b’ibi bitaro utashatse ko amazina ye atangazwa, yabwiye ikinyamakuru Ukwezi ko Habineza Jean Claude basanzwe bamuzi nk’inyangamugayo ariko ngo kuko yari afite ubumuga yagiriye mu kazi (Paralysis) hari serivisi atabashaga gutanga neza bityo ubuyobozi bw’ibitaro ntibumwishimire.

Yagize ati: “Ntabwo twigeze tubyumva kandi tubona bitanashoboka, uriya mugabo yaragambaniwe. Yari afite ubumuga yagiriye mu kazi, kuko yari yarabaye pararize nyine hari ibyo atashoboraga gukora, ugasanga ubuyobozi buramwinuba, dukeka ko byaba ari byo byatumye babimugerekaho. Nonese yari kwiba igikoresho mu bitaro akakijyana ku kiraro cy’inka ze ntanagishyire ahandi hantu ngo agihisheyo? Ntabwo byumvikana rwose.”

Hari undi mukozi w’ibi bitaro wabwiye itangazamukuru ko umuyobozi w’ibitaro (Medecin Directeur) Dr Fulgence Nkikabahizi asanzwe akunda gushaka kwikiza umukozi wese adashaka, ndetse ngo ninabyo byatumye akurwa mu bitaro bya Rwinkwavu yahoze ayobora, aho nko mu mpera za 2015 MINISANTE yabonye ko kutumvikana n’abo ayobora byatumye hari abahabwa serivisi mbi, bikaza kuzamba ubwo umubyeyi yabagwaga hifashishijwe urumuri rwa telefone bikamuviramo gupfa mu gihe ubuyobozi bwari bwimanye mazutu ya moteri itanga amashanyarazi (generator) ngo uwo mubyeyi abagwe habona.

Umuturanyi wa Habineza Jean Claude utashatse ko amazina ye atangazwa, avuga ko nabo iby’akagambane yaba yarakorewe n’ubuyobozi bw’ibitaro bakumva ariko bakaba batanashira amakenga umugore we Uyisaba Claudine kuko ngo bari babanye nabi ndetse umugabo yigeze no kumuhunga amara iminsi ataba mu rugo, bityo bakumva bishoboka ko nawe yaba yarafatanyije n’ubuyobozi bw’ibitaro bakamugambanira. Avuga ko ubwo Habineza Jean Claude yafatwaga, yavuze ko ntakindi yavuga kuko uwamuhigaga amubonye.

Kavamahanga Vincent ni Umunyamabanga Nshingwabikorwa w’akagari ka Butunzi muri uyu murenge wa Kinihira aho Habineza Jean Claude n’umuryango we batuye. Uyu muyobozi yavuze ko nta kibazo cy’amakimbirane uyu muryango wagejeje mu buyobozi ariko agashimangira ko nawe iby’uko yagambaniwe n’umugore kuko batari babanye neza abyumva mu baturage babivuga.

Dr Dr Fulgence Nkikabahizi avuga ko nta kibazo azi ku mibanire ya Habineza Jean Claude n’abo bakorana cyangwa ubuyobozi bw’ibitaro, avuga ko ibindi bizagaragazwa n’inzego zishinzwe kumukurikirana.

Uyisaba Claudine, umugore wa Habineza Jean Claude, we mu kiganiro twagiranye  yavuze ko abamushinja kugambanira umugabo we bamubeshyera, kuko ngo iyo umuntu yahuye n’ikibazo buri wese abivuga uko abishatse. Gusa nawe yemera ko ibyabaye ku mugabo we ntawabura kubikekamo akagambane ariko mu bamugambanira ngo we ntashobora kubamo.

Leave a Reply

Your email address will not be published. Required fields are marked *