RWANDA:KWIBUKA KU NSHURO YA 25 JENOSIDE YAKOREWE ABATUTSI

Kwibuka25: Amatariki akomeye yaranze jenoside yakorewe Abatutsi kuva tariki ya 6 Mata kugeza ku ya 4 Nyakanga 1994.

Mu gihe hibukwa jenoside yakorewe Abatutsi ku nshuro ya 25, hari amatariki Abanyarwanda bazirikana kuva ku wa 6 Mata ubwo indege y’uwari Perezida, Juvenal Habyarimana yaraswaga, kugeza muri Nyakanga 1994, ubwo ingabo za FPR/Inkotanyi zafataga Umujyi wa Kigali ndetse zikanahagarika jenoside.

Tariki ya 6 Mata 1994 saa 08:25 z’umugoroba: Indege yari itwaye Abaperezida Juvénal Habyarimana na Ntaryamira Cyprien yarasiwe i Kanombe mu mujyi wa Kigali ubwo bari bavuye mu nama Arusha muri Tanzaniya. Mu masaha yakurikiyeho ni bwo umutwe w’abasirikari barindaga Habyarimana, abasirikare, abajandarume n’Interahamwe batangiye gushyiraho za bariyeri hose muri Kigali.

Tariki ya 7 Mata 1994: Minisitiri w’Intebe, Agatha Uwilingiyimana, Perezida w’Urukiko rurinda Itegeko Nshinga, Joseph Kavaruganda barishwe. Ni na bwo hatangiye kwicwa Abatutsi urugo ku rundi, hanicwa abasirikare 10 b’Ababiligi, abarwaza, abarwayi n’abaganga ba CHUK. Kuri iyi tariki ni na bwo abasirikare bahoze ari aba FPR Inkotanyi bavuye muri CND batangira kurwana n’abicanyi.

Tariki ya 8 Mata 1994: Ubwicanyi bwatangiye gukwira mu gihugu hose, bamwe mu bayobozi batangira guhungira muri Ambasade y’u Bufaransa mu Rwanda biganjemo Abaminisitiri. Abantu barenga 100 biciwe mu ishuri rya Mutagatifu Andereya i Nyamirambo. Koloneli Théoneste Bagosora yateranyije inama yo kugena abayobozi bakuru b’igihugu bari bamaze gupfa.

Tariki ya 9 Mata 1994: Théodore Sindikubwabo yabaye Perezida w’igihugu w’agateganyo, Jean Kambanda agirwa Minisitiri w’Intebe wa Guverinoma y’Abatabazi. “Opération Amaryllis” y’Abafaransa yageze mu Rwanda izanye n’iy’Ababiligi yitwaga “Opération Silverback”.

Umuryango wa Habyarimana wajyanywe i Bangui muri Repubukika ya Centre Afrika bahavanwa bajya mu Bufaransa.

Tariki ya 12 Mata 1994: Guverinoma yavuye i Kigali ihungira i Murambi muri Gitarama.

Ku ya 13 Mata 1994: Ingabo z’Ababiligi zafashe icyemezo cyo kuva mu Rwanda zita impunzi z’abatutsi zari zabahungiyeho muri ETO Kicukiro. Interahamwe n’abasirikare bahita batangira kubiraramo, abasigaye babazamura Nyanza ya Kicukiro ari naho babarangirije.

Ku ya 14 Mata 1994: Ubwicanyi bwakorewe mu bitaro bya Kibeho ku Gikongoro

Ku ya 15 Mata 1994: Ubwicanyi bwabereye i Nyarubuye muri Kibungo no muri Paruwasi ya Mubuga ku Kibuye

Tariki ya 16 Mata 1994: Ubwicanyi kuri Paruwasi ya Mugonero ku Kibuye

Ku ya 18 Mata 1994: Hishwe abari bahungiye muri Sitade Gatwaro (Kibuye).

Ku ya 20 na 22 Mata 1994: Interahamwe n’abasirikare biraye mu barwayi, abarwaza n’abavuzi bo mu bitaro bya Kaminuza i Butare barabica.

Tariki ya 21 Mata 1994: Ingabo z’Umuryango w’Abibumbye mu Rwanda (MINUAR) zaragabanyijwe ziva ku bihumbi 5,500 zigera kuri 270.

Ku ya 27 Mata 1994: Papa Yohani Pawulo II yatangaje bwa mbere ko ibyari biri kubera mu Rwanda ari Jenoside.

Ku ya 28 Mata 1994: Amerika na yo yemeye ko ibyaberaga mu Rwanda byari Jenoside bisobanurwa n’umuvugizi wayo Christine Shelley.

Ku ya 30 Mata 1994: Impunzi 250.000 zambutse umupaka zijya muri Tanzaniya bahunga intambara FPR yarwanaga na FAR.

Ku ya 12 Gicurasi 1994: Umuyobozi wa Komisiyo y’Uburenganzira bwa Muntu muri Loni na we yavuze ko mu Rwanda harimo kubera Jenoside.

Tariki ya 13 na 14 Gicurasi 1994: Ni bwo abasirikare ba Leta yari yariyise iy’abatabazi bifatanyije n’abapolisi, Interahamwe n’abaturage maze batera abaturage bo mu Bisesero ku musozi wa Muyira bicamo abaturage batabarika bari babashije kwirwanaho mbere.

Muri Gicurasi 1994: Umuryango utabara imbabare watangaje ko hamaze gupfa abantu barenga ibihumbi 500.

Ku ya 22 Gicurasi 1994: Ingabo zari iza FPR Inkotanyi zafashe ikibuga cy’indege mpuzamahanga cya Kanombe.

Tariki ya 27 Gicurasi 1994: Habayeho guhererekanya impunzi hagati ya FPR na FAR biyobowe na MINUAR buri wese agahitamo aho agomba kujya yaba mu gice kiyoborwa na FPR cyangwa na Guverinoma y’Abatabazi.

Ku ya 29 Gicurasi 1994: Guverinoma y’Abatabazi yahungiye ku Gisenyi ari na ho yavuye igana mu cyahoze ari Zayire.

Ku ya 2 Kamena 1994: Gitarama na Kabgayi byagiye mu maboko ya FPR Inkotanyi

Ku ya 16 Kamena 1994: FPR yabohoje impunzi zari zahungiye muri Kiliziya y’Umuryango Mutagatifu i Kigali no muri Saint Paul.

Ku ya 22 Kamena 1994: Akanama gashinzwe umutekano ku isi kemereye Ingabo z’u Bufaransa kuza muri “Opération Turquoise”.

Ku ya 28 Kamena 1994: Umuryango w’Abibumbye wasohoye raporo ivuga kuri Jenoside yakorewe Abatutsi mu Rwanda. Tariki ya 4 Nyakanga 1994: Umujyi wa Kigali na Butare byafashwe na FPR Inkotanyi, Ingabo z’Abafaransa zitangaza ko Kibuye, Gikongoro na Cyangugu zizazicungira umutekano.

Leave a Reply

Your email address will not be published. Required fields are marked *